Súpur þurfa alls ekki að vera leiðilegur né ósparilegur matur. Það er alveg hægt að bjóða upp á bragðgóðar og hollar súpur við hátíðleg tilefni og er það í rauninni mjög sniðugt. Ég elska sjálf saðsamar og góðar grænmetissúpur og er það ein besta leiðin til að fá góðan skammt af grænmeti í kroppinn. Þessi ungverska grænmetissúpa er í miklu uppáhaldi hjá mér og ætla ég að deila með þér uppskriftinni af henni sem er mjög einföld og þægileg.
Ungversk grænmetissúpa fyrir 3-4
- 1 laukur
- 1 rauðlaukur
- 1 rauð paprika
- 1 græn paprika
- 160g sæt kartafla
- 1/2 kúrbítur
- 1,5 L vatn
- 1 hvítlauksgeiri
- 4 msk tómatpúrra
- 2 tsk paprikuduft
- 3 tsk reykt paprika
- 2 msk kúmen fræ
- 2,5 msk gróft salt
- 1 msk grænmetiskraftur
- 2 tsk tamarisósa
- 1 tsk chilli mauk (má sleppa)
- smá pipar
- Byrjaðu á því að skera allt grænmetið fallega niður.
- Byrjaðu síðan á að steikja laukinn upp úr kókosolíu eða hitaþolinni ólífuolíu.
- Bættu síðan öllu grænmetinu saman við og láttu það eldast aðeins.
- Næst bætir þú vatninu saman ásamt öllum hinum innihaldsefnunum.
- Láttu síðan súpuna malla í 30-40 mínútur.
Súpan er upplögð með mjólkurlausum sýrðum rjóma en þú finnur uppskriftina af honum hér.
Verði þér að góðu!
-Anna Guðný
No Comments