Njóttu Millimála

Ofurhetjuís

Það er svo gott að gera sína eigin ísa úr frosnum ávöxtum og er þetta að mínu mati langbesta orkuskotið um miðjan daginn. Krakkar elska ísa og það er mjög sniðugt að fá þau með í eldhúsið að útbúa svona gúmmelaði. Leyfa þeim að gera allt sjálf, stoppa – smakka og segja til um hvort eitthvað megi bæta. Það er mjög sniðugt að nota svona ísgerð sem kjörið tækifæri til að lauma allskonar heilsufarsbætandi fæðu ofan í maga hjá bæði börnum og fullorðnum.

Eitt af því sem að mér finnst erfitt að koma í fæðuna hjá bæði mér og syni mínum er grænt salat, en að borða fjölbreytt úrval af grænu salati er mjög gott fyrir ónæmiskerfið okkar og lífskraft. Mér finnst því mjög sniðugt að gera mjög reglulega græna ísa eða þeytinga sem ég set t.d. grænkál, spínatkál og/eða grænar ofurfæðublöndur í til að fá ennþá meiri breidd af næringarefnum og vítamínum.

Ofurhetjuís

1 bolli frosinn ananas
1 bolli frosið mangó
2 kubbar frosið spínat
Fersk íslensk mynta (má sleppa)
Ferskt engifer

Settu allt hráefnið í matvinnsluvél og láttu hana vinna mjög vel & lengi. Ef vélin ræður ekki við þetta getur þú leyft þessu frosna að standa aðeins í vélinni og haldið svo áfram eða skvett smá af vatni saman við þetta 🙂 Ég bar ísinn svo fram með hampfræjum og frosnum hindberjum.