Blondínur með súkkulaðibitum

Þessar dásemdar blondínur eru eitthvað sem að þú verður að prufa að útbúa. Þær eru ótrúlega auðveldar í framkvæmd og eru þær ekkert smá góðar. Ég er búin að vera með þessa uppskrift í huganum lengi og heppnaðist hún ótrúlega vel, ég elska svo mikið þegar að það gerist. Blondínurnar eru bæði glútenlausar, vegan og innihalda ekki mikið unninn sykur. Þær fara því vel í maga og getur maður notið þeirra með góðri samvisku. Það er sniðugt að útbúa blondínurnar fyrir barnaafmælið, sunnudagskaffið, ferðalagið eða bara til að eiga í frystinum og taka eina út þegar að þig langar að njóta svona dýrindis góðgætis.

Blondínur með súkkulaðibitum

• 2 msk möluð chia fræ + 4 msk vatn
• 2 dl kjúklingabaunir
• 2 dl haframjöl
• 2 dl kasjúhnetusmjör
• 4 msk kakósmjör
• 3 msk hlynsíróp
• 1 dl kókospálmasykur
• 1 dl sykurlaus milkadamia mjólk
• 1 tsk eplaedik
• 1 tsk matarsódi
• 1 tsk vanilluduft
• gróft salt
• 70 g 70% súkkulaði

1. Byrjaðu á því að mala chiafræ í kaffikvörn og hrærðu þau svo saman við vatnið.
2. Næst setur þú haframjöl í matvinnsluvélina þar til að það verður að hveiti. Þá er þér óhætt að bæta kjúklingabaununum og kókospálmasykrinum saman við og láta vélina vinna aðeins.
3. Næst Skellir þú öllum hinum innihaldsefnunum saman við fyrir utan súkkulaðið. Þú bætir því rétt saman við í lokinn með sleif. Ef deigið er heitt þá myndi ég kæla það aðeins í ísskáp áður en þú blandar súkkulaðibitunum saman við.
4. Settu deigið svo í lítið form og klæddu það með bökunarpappír. Bakaðu í 35-40 mín við 180°C.

Ég mæli með að njóta með ískaldri heimatilbúnni möndlumjólk eða þá sykurlausu milkadamia mjólkinni. En milkadamia mjólkin er í miklu uppáhaldi á mínu heimili og er frábær þegar að ég á ekki heimatilbúna möndlumjólk.