Jólanna Njóttu

Ómótstæðilegar súkkulaðibitasmákökur

22. nóvember, 2018

Nú styttist óðum í jólin og eru því margir farnir að leita eftir girnilegum og spennandi smákökuuppskriftum. Ég er ekki mikið fyrir að baka brjálæðislega margar sortir í desember enda vil ég frekar einblína á það að njóta í staðin fyrir að eyða öllum tímanum í eldhúsinu. Einnig er allt í lagi þó að smákökurnar klárist löngu fyrir jól, það verður nóg af öðru til að gæða sér á yfir jólin og enginn hætta á að maður svelti. En ef við komum okkur að máli málanna þá hef ég í mörg ár verið að reyna að fullkomna uppskrift af súkkulaðibitakökum og er ég gríðarlega sátt við útkomuna í ár. Það er svo gaman að gera einhverja árlega uppskrift eins og t.d. súkkulaðibitakökur og sjá hversu mikið maður hefur bætt sig í uppskriftargerð sem nýtist manni til að þróa uppskriftirnar sínar enn frekar. Súkkulaðibitakökurnar eru svo stökkar, bragðgóðar og fullkomnar að njóta með ískaldri heimagerðri möndlumjólk eða heitu súkkulaði. Mmmm!

Ómótstæðilegar súkkulaðibitakökur

  • 2 msk möluð chia fræ + 4 msk vatn
  • 6 dl haframjöl
  • 2 dl möndlumjöl
  • 1,5 dl kókospálmasykur
  • 1 dl kókosolía
  • 2 dl möndlusmjör
  • 1 tsk matarsódi
  • 1 tsk eplaedik
  • 150 ml möndlumjólk
  • ¼ tsk vanilluduft
  • ½ tsk gróft salt
  • 40 g ristaðar kasjúhnetur
  • 100 g 70% vegan súkkulaði
  1. Byrjaðu á því að mala chia fræ í kaffikvörn og hræra vatninu saman við þau í bolla. Settu til hliðar.
  2. Næst skalt þú setja haframjöl, möndlumjöl og kókospálmasykur í matvinnsluvél og láta vinna þar til að haframjölið verður að hveiti.
  3. Að lokum bætir þú restinni af innihaldsefnunum saman við fyrir utan súkkulaðið og lætur þetta vinna vel saman. Ekki gleyma chiagelinu, skeltu því útí líka.
  4. Ef að smákökudeigið er heitt skaltu kæla það aðeins áður en þú setur súkkulaðibitana saman við.
  5. Svo mótar þú bara smákökur með höndunum og setur á bökunarplötu.
  6. Bakaðu í ofni við 180°C í u.þ.b. 15-20mín. Leyfðu þeim að kólna alveg áður en þú hreyfir við þeim

                            Þessi færsla er unnin í samstarfi við heilsu.

You Might Also Like

No Comments

Leave a Reply

Vantar þig hugmyndir að hollum og bragðgóðum mat?

Þá er rafræna uppskriftarbókin mín eitthvað fyrir þig og þú getur skoðað hana í hvaða tæki sem er. Í uppskriftarbókinni eru hugmyndir fyrir allar máltíðir dagsins ásamt ýmsu girnilegu góðgæti.

Uppskriftirnar eru vegan, glútenlausar og lausar við unna sætu.

Verslaðu bókina hér