Njóttu Góðgætis

Heimagert súkkulaði

13. maí, 2016

Þetta súkkulaði geri ég oft og á í frystinum. Það klárast hrikalega hratt enda er það svo rosalega gott. Það er enginn vandi að gera sitt eigið súkkulaði og er gaman að bjóða gestum og gangandi upp á heimagert súkkulaði. Það er oft allskonar aukaefni í súkkulaði sem maður kaupir út í búð í dag og hrikalega erfitt að finna eitthvað sem er laust við unninn sykur og mjólkurvörur. Ég skora því á þig að prufa að gera þitt eigið súkkulaði og get lofað þér því að þú verður húkt.

Heimagert súkkulaði

  • 100g kókosolía
  • 50g kakósmjör
  • 60 g kakó
  • ½ dl hunang
  • ¼ tsk vanilla
  • 1/4 tsk salt
  • 30 g goji ber
  • 30g mórber
  • 30 g smátt skornar döðlur
  • 60 g möndlur
  • 10 g kókosflögur
  1. Skerðu döðlurnar smátt og möndlurnar gróft niður.
  2. Skelltu kókosolíunni og kakósmjörinu í pott og láttu bráðna við vægan hita.
  3. Hrærðu síðan kakóinu, hunanginu, vanillunni og saltinu saman við. Smakkaðu til.
  4. Taktu pottinn af hellunni og blandaðu restinni af innihaldsefnunum saman við með sleif.
  5. Klæddu lítið eldfast mót með bökunarpappír og settu síðan blönduna ofan í mótið og inn í frysti.
  6. Þegar að súkkulaðið er tilbúið (eftir ca. 2-3 klst) skalt þú taka það út og skera það niður í bita. Geymdu það í loftþéttu íláti í frystinum og gæddu þér á þessu beint þaðan þar sem að súkkulaðið bráðnar strax þegar það er látið standa við stofuhita.

Þessi uppskrift er ekki heilög og hvet ég þig til að smakka hana til á meðan þú gerir hana. Það er misjafnt hvað fólk vill hafa mikla sætu og hversu sterkt kakóbragð má vera. Einnig er misjafnt hvað manni langar að setja í súkkulaðið sitt og hvet ég þig til að velja þurrkaða ávexti og hnetur eftir þínum smekk.

Verði þér að góðu og njóttu í botn!

Ást og friður,

-Anna Guðný

You Might Also Like

No Comments

Leave a Reply