Njóttu Góðgætis

Heimagerð vegan páskaegg með “mjólkur“súkkulaði

25. mars, 2018

Nú er orðið stutt í páska og örugglega margir að hugsa um hvernig páskaegg þeir eiga að gúffa í sig á páskadag. Ég var farin að hugsa hvort ég ætti bara að kaupa mér vegan páskaegg út í búð en þegar að ég las á innihaldslýsinguna á því gat ég það bara alls ekki. Ég vissi ekki hvað helmingurinn af þessum innihaldsefnum var. En samt frábært að það séu í boði vegan páskaegg út í búð, örugglega margir sem að taka fagnandi á móti þeim.

Ég ákvað því að fara að tilraunast í eldhúsinu og útbúa mitt eigið páskaegg. Súkkulaðið sem ég gerði er ekki einungis vegan heldur er það líka án unnar sætu. Það eru til skrilljón vegan súkkulaði þarna úti en þau eru flest með unni sætu sem að fer alls ekki vel í mig. Þegar að ég borða unna sætu finn ég ekki bara fyrir því líkamlega heldur fer það einnig í mig andlega; ég verð þreytt, pirruð, og æst í meiri sykur. Svo að ég mæli heilshugar með að útbúa þitt eigið súkkulaði, það er miklu hreinna og gæðameira. Fyrir utan það hvað það er skemmtilegt að búa til sitt eigið súkkulaði, ég elska það! Þetta súkkulaði er með þeim betri sem ég hef gert og mun það eflaust verða til í frystinum reglulega hjá mér hér eftir. Það minnir bara heilmikið á þetta hefðbundna páskaeggjamjólkursúkkulaði og er það besta sem ég hef smakkað!

 Kókosmjólkursúkkulaði

  • 100 ml kókosolía
  • 50 ml kakósmjör
  • 60-70 ml döðlusíróp
  • 3,5 msk kakó
  • 2 msk kókosmjólk*
  • 1 msk kasjúhnetusmjör**
  • 1/2 tsk vanilluduft
  • gróft salt

*Ég notaði kókosmjólk í dós sem var við stofuhita. Ég hrissti hana áður en ég opnaði hana og þá varð hún þykkari og kremaðari en kókosmjólk sem að maður notar til drykkjar.
**Ef að þú finnur ekki kasjúhnetusmjör þá kemur möndlsmjör örugglega vel út í staðin.

  1. Byrjaðu á því að bræða kókosolíuna og kakósmjörið.
  2. Hrærðu síðan öllum innihaldsefnunum saman með písk í skál.
  3. Leyfðu súkkulaðinu að ná stofuhita, þá er gott að setja það jafnvel á aðeins kaldari stað eins og t.d. út í glugga eða örstutt inn í ísskáp. Þá nær það að þykkna aðeins og það verður auðveldara að smyrja páskaeggjaformið með því.
  4. Ég notaði páskaeggjasilikonform sem að ég fann í söstrene grene (ekki spons;) og finnst mér það fullkomin stærð. Gott er að setja páskaeggjaformið í frystirinn áður en maður setur súkkulaðið í það. Þegar að súkkulaðið hefur orðið aðeins þykkara þá setur þú súkkulaðið ofan í með skeið og passar að það sé nóg af því á alla kanta.
  5. Ef að þú hefur ekki þolinmæði til að bíða eftir að súkkulaðið kólni þá getur þú alveg sett það í formið strax en þú þarft þá að gera margar umferðir og að snúa forminu á alla kanta til að súkkulaðið nái á allar hliðar eggsins. Þá setur þú smá súkkulaði, frystir, tekur út aftur og setur meira, frystir afturo.s.frv.
  6. Lykilatriði er bara að hafa nógu mikla þykkt af súkkulaði á efstu brúninni, ca. 0,4 cm, svo að það sé ekki brothætt þegar að þú tekur það úr forminu.
  7. Þegar að eggin eru tilbúin í forminu þá tekur þú þau varlega úr og festir þau saman með því að setja súkkulaði á samskeytin.

Þó að þetta sé löng aðferðarlýsing þá er þetta mjög einfalt og afar fljótlegt því að eggin harðna á innan við 10 mínútum í frystinum.Ég setti súkkulaðihúð mórber, þurrkað ávaxtahlaup og ristaðar kasjúhnetur ofan í eggið mitt. Endilega settu þitt uppáhaldsgóðgæti. En ég mæli með því að setja ekkert í páskaeggin og líma þau ekki saman fyrr en á páskadaginn sjálfan ef að þú vilt hafa eitthvað inni í þeim. Svo eru miðarnir sem eru alltaf á yogi teum mjög sniðugir til að nota sem málshátt. Ég veit ekki hvað ég er búin að drekka mikið af yogi te bara útaf þessum skemmtilegu skilaboðum sem fylgja hverju tei.

Páskaeggin verða að geymast í frysti og bráðna fljótt við stofuhita.

Njóttu í botn og eigðu gleðilega páska!

-Anna Guðný

 

You Might Also Like

No Comments

Leave a Reply